Այսօր՝ փետրվարի 24-ին, մեկ հարկի տակ էին հավաքվել ՀՀ Աշխատանքի և Սոցիալական Հարցերի նախարարությանը կից գործող Միասնական սոցիալական ծառայության տարածքային կենտրոնների շուրջ 50 աշխատակիցներ՝ մասնակցելու «Փոփոխելով ընտանեկան բռնության հարցերով օրակարգը Հայաստանում» ծրագրի շրջանակում անցկացվող՝ «ՄԻԱՎ-ով ապրող և ԹՆՕ կանանց նկատմամաբ գենդերային հիմքով բռնության դեմ հակազդում ՀՀ- ում» խորագրով դասընթացին, որը նախաձեռնել են ՄԱԿ-ի վստահության հիմնադրամը, Ընդդեմ կանանց նկատմամբ բռնության կոալիցիան և «Իրական Աշխարհ, Իրական Մարդիկ» ՀԿ-ն՝ ՀՀ Աշխատանքի և սոցիալական հարցերի նախարարության աջակցությամբ:

Դասընթացի հիմնական թեմաներն էին՝ ՄԻԱՎ-ի և ՁԻԱՀ-ի ընդհանուր հիմունքները, ՄԻԱՎ-ով ապրող և ԹՆՕ կանայք բռնության համատեքստում, խտրականություն, խարան, ԹՆՕ անձանց հետ իրականացվող աշխատանքների առանձնահատկությունները, ինչպես նաև անձնական տվյալների պաշտպանությունն ու սոցիալ-հոգեբանական աշխատանքի առանձնահատկությունները ՄԻԱՎ-ով ապրող անձանց հետ:

Դասըթացավարները՝ ԻԱԻՄ ՀԿ-ի անդամներն էին՝ նախագահ Ժենյա Մայիլյանը, ծրագրի համակարգող Սարգիս Ավետիսյանը, իրավաբան-փորձագետ Վաղինակ Տեր-Հովհաննիսյանը, ինչպես նաև ծրագրի համակարգող Նաիրուհի Սաֆարյանը:

Հանդիպմանը միասնական սոցիալական ծառայության տարածքային կենտրոնների աշխատակիցների համար կազմակերպվեց նաև ինտերակտիվ առաջադրանքներ, որի ընթացքում մասնակիցները բաժանվեցին թիմերի և փորձեցին լուծել այն խնդիրները, որոնք ստացել էին բանախոսների կողմից: Դասընթացը մասնակիցներին հնարավորություն ընձեռեց նաև իրենց հետաքրքրող հարցերը բարձրաձայնել և ստանալ սպառիչ պատասխաններ: Դասընթացի ավարտին բոլոր մասնակիցներին շնորհվեց մասնակցության վկայականներ: